युद्धाचं भूत उतरेना! 40 तासांनंतर शेअर मार्केटला ग्रहण लागणार? सोने-चांदीच्या दरांत धमाक्याची चिन्हे

US-Iran War Impact: जून 2025 मध्ये 12 दिवसांच्या हवाई हल्ल्यानंतर इस्रायल-अमेरिकेने शनिवारी संयुक्तपणे इराणवर हल्ला केला, ज्यामुळे मध्य-पूर्वेत नव्याने युद्धाचा भडका उडाला आणि तेहरानच्या पश्चिमेकडील देशांसोबतच्या आण्विक वादावर राजनैतिक तोडगा काढण्याच्या आशा आणखी धूसर झाल्या आहेत.

इस्रायल-अमेरिकेचा इराणवर हल्ला, युद्धाने भू-राजकीय तणाव वाढणार

मध्य-पूर्वेत अमेरिका आणि इस्रायलच्या संयुक्त कारवाईनंतर आता गुंतवणूकदारांमध्ये भू-राजकीय तणाव आणि अनिश्चितता वाढण्याची भीती असेल. अशा स्थितीत, सोमवारी व्यापार पुन्हा सुरू झाल्यावर विविध मालमत्ता, विशेषतः इक्विटी, सोने आणि चांदी, कच्चे तेलासह वेगवेगळ्या बाजारात तीव्र प्रतिक्रिया उमटण्याची शक्यता आहे.

अमेरिका-इराण युद्धावर भारतीय बाजाराची प्रतिक्रिया

शेअर बाजारातील तज्ज्ञांनुसार अमेरिका-इराण युद्धाच्या चर्चेत वाढ झाल्याने जागतिक बाजारांवर नकारात्मक परिणाम होईल, ज्यामध्ये भारतातील दलाल स्ट्रीटचाही अपवाद ठरणार नाही. मात्र, शुक्रवारी देशांतर्गत बाजारात मोठ्या प्रमाणात विक्री झाल्यामुळे सोमवारी, आठवड्याच्या पहिल्याच व्यापार दिवशी, बाजारात विक्री मर्यादेत राहू शकते असेही त्यांनी म्हटले. भारतीय बाजारात मोठी विक्री किंवा मोठ्या गॅप-डाउन ओपनिंगऐवजी कमकुवत ट्रेंड अपेक्षित आहे.

अमेरिका-इराण संघर्षाचा सोने-चांदीच्या दरांवर काय परिणाम होणार?

एकीकडे शेअर बाजारात गुंतवणूकदारांना मोठ्या घसरणीची भीती लागून आहे तर, दुसरीकडे सोने आणि चांदीच्या बाजारातही अमेरिकेच्या इराणवरील हल्ल्याचे पडसाद उमटू शकतात. अमेरिका आणि इस्रायलच्या हल्ल्याने मध्य-पूर्वेला पुन्हा एकदा लष्करी संघर्षात ढकलल्यानंतर सोमवारी सोने आणि चांदीच्या व्यापाऱ्यांना धमाका अपेक्षित आहे.

शुक्रवारी, भारतीय बाजारात सोने आणि चांदीच्या दरांमध्ये घट नोंदवली गेली. एप्रिलमधील सोन्याचा वायदा भाव एमसीएक्सवर 2262 रुपयांनी वाढून 1,61,971 रुपयांवर स्थिरावला तर, मे चांदीचे फ्युचर्स 10,037 रुपये वाढून 2,81,990 रुपयांवर उसळले. फेब्रुवारी महिन्यात सोनाच्या वायदा दरात 8.32% किंवा 12,451 रुपये प्रति 10 ग्रॅम वाढ झाली. त्याचवेळी, एमसीएक्सवरील चांदीचा दर फेब्रुवारीमध्ये जवळपास 3% किंवा 9,300 रुपयांनी घसरला.

(Disclaimer : वरील तपशील केवळ माहितीसाठी आहे, गुंतवणूक सल्ला नाही. वरील मते आणि शिफारसी वैयक्तिक विश्लेषक किंवा ब्रोकिंग कंपन्यांचे आहेत, महाराष्ट्र टाइम्सचे नाही. आम्ही गुंतवणूकदारांना कोणताही गुंतवणूक निर्णय घेण्यापूर्वी प्रमाणित तज्ञांकडून तपासणी करण्याचा सल्ला देतो.)

2026-02-28T11:02:02Z